کینیڈا میں بھارتی جرائم پیشہ نیٹ ورکس کا انکشاف

آسٹریلیا کے معروف جریدے اسپیکٹیٹر آسٹریلیا نے ایک رپورٹ میں کینیڈا میں سرگرم بھارتی جرائم پیشہ نیٹ ورکس سے متعلق سنسنی خیز انکشافات کیے ہیں۔ رپورٹ کے مطابق کینیڈا کے مختلف شہروں میں منظم جرائم کی سرگرمیوں میں بھارتی گروہوں کے ملوث ہونے کے شواہد سامنے آئے ہیں۔
جریدے کے مطابق کینیڈا کے شہر سرے میں رواں سال جنوری سے اب تک 35 بھتہ خوری کے واقعات رپورٹ ہو چکے ہیں، جبکہ صوبہ اونٹاریو میں گزشتہ تین برسوں کے دوران بھارتی گروہوں سے منسلک 1500 سے زائد بلیک میلنگ کے کیسز سامنے آئے۔ رپورٹ میں کہا گیا ہے کہ ان جرائم نے مقامی کاروباری برادری میں خوف و ہراس کی فضا پیدا کر دی ہے۔
اسپیکٹیٹر آسٹریلیا نے دعوی کیا ہے کہ بدنام زمانہ بھارتی بشنوئی گروہ کینیڈا میں بھتہ خوری دھمکیوں اور دیگر جرائم میں ملوث ہے۔ مزید یہ کہ بعض کینیڈین پولیس رپورٹس میں یہ الزام بھی سامنے آیا ہے کہ بھارتی حکومت جرائم پیشہ گروہوں کو اپنے مقاصد کے لیے استعمال کر رہی ہے، تاہم اس حوالے سے سرکاری سطح پر واضح مؤقف سامنے نہیں آیا۔
رپورٹ میں یہ بھی کہا گیا ہے کہ کینیڈا میں موجود کچھ سکھ گروپوں نے الزام عائد کیا ہے کہ بشنوئی گروہ مبینہ طور پر بھارتی حکومت کے اشاروں پر خالصتان کے حامی افراد کو نشانہ بنا رہا ہے، جس سے بیرون ملک سیاسی کشیدگی کے اثرات جرائم کی صورت میں ظاہر ہو رہے ہیں۔