امریکا اور اسرائیل کی جانب سے ایران کے خلاف کارروائیوں کے بعد مشرقِ وسطیٰ میں کشیدگی بڑھ گئی ہے اور خطے کے کئی ممالک اس تنازع سے متاثر ہوئے ہیں۔ مختلف حکام کے مطابق 9 مارچ تک متعدد ممالک میں سینکڑوں افراد ہلاک ہو چکے ہیں۔
رپورٹس کے مطابق ایران میں اب تک تقریباً 1200 سے زائد افراد جان سے جا چکے ہیں، جن میں اسکول پر حملے میں جاں بحق ہونے والی طالبات اور عملے کے افراد بھی شامل ہیں۔ اسرائیل میں 2 فوجیوں سمیت 11 شہری ہلاک ہوئے جبکہ کارروائیوں کے دوران 7 امریکی فوجی بھی مارے گئے۔
لبنان میں اسرائیلی حملوں کے نتیجے میں تقریباً 394 افراد ہلاک ہوئے جن میں درجنوں بچے بھی شامل ہیں۔ اس کے علاوہ عراق میں 15 افراد، شام میں 4 افراد اور متحدہ عرب امارات میں 4 افراد جان سے گئے۔
دیگر ممالک میں بھی ہلاکتیں رپورٹ ہوئیں جن میں سعودی عرب میں 2، کویت میں 4، بحرین میں 1 اور عمان میں 1 شخص شامل ہے۔ خطے میں جاری کشیدگی کے باعث مزید جانی نقصان کا خدشہ ظاہر کیا جا رہا ہے۔