سعودی عرب نے بارش کے پانی کو محفوظ بنانے کے لیے ایک ہزار ڈیم تعمیر کرنے کا فیصلہ کیا ہے۔ وزیر ماحولیات انجینئر عبدالرحمان الفضلی کے مطابق ماحولیات کی بہتری اور پائیدار ترقی کے لیے پانچ بڑے ماحولیاتی مراکز قائم کیے گئے ہیں۔ سعودی گرین انیشیٹیو کے تحت اب تک 151 ملین درخت لگائے جا چکے ہیں، جبکہ 2030 تک یہ تعداد 215 ملین تک پہنچائی جائے گی۔
پارکوں کی تعداد 18 سے بڑھ کر 500 ہو گئی ہے، جبکہ معدومی کے خطرے سے دوچار جانوروں کے لیے فطری افزائش گاہیں قائم کی گئی ہیں۔ فضائی آلودگی پر قابو پانے کے لیے 240 ایئر کوالٹی سینٹرز قائم کیے جا چکے ہیں۔
پانی صاف کرنے کی صلاحیت 8.8 ملین مکعب میٹر سے بڑھا کر 16.6 ملین مکعب میٹر کر دی گئی ہے، جس میں سمندری پانی کا بڑا حصہ شامل ہے۔ زراعت میں ترقی کے لیے 118 ارب ریال کی معاونت دی گئی، جس سے زرعی پیداوار 12 ملین ٹن تک جا پہنچی ہے۔ سعودی عرب کئی زرعی اجناس اور پولٹری میں خود کفیل ہو چکا ہے۔