ایران کی قومی فٹبال ٹیم کی فیفا ورلڈ کپ 2026 میں شرکت پر سوالات اٹھنے لگے ہیں۔ ایرانی فٹبال فیڈریشن کے صدر مہدی تاج نے موجودہ حالات میں ٹورنامنٹ میں شرکت کو غیر یقینی قرار دیا ہے۔
رپورٹس کے مطابق حالیہ امریکی کارروائیوں اور خطے میں بڑھتی کشیدگی کے بعد صورتحال پیچیدہ ہو گئی ہے۔ ہسپانوی اخبار مارکا سے گفتگو میں مہدی تاج کا کہنا تھا کہ حالیہ پیش رفت کے بعد ورلڈ کپ میں شرکت کے حوالے سے پُرامیدی مشکل دکھائی دیتی ہے، تاہم حتمی فیصلہ متعلقہ حکام کریں گے۔
دوسری جانب فیفا کے سیکریٹری جنرل میتھیاس گراف اسٹروم نے کہا ہے کہ صورتحال پر نظر رکھی جا رہی ہے اور قبل از وقت کوئی تفصیلی تبصرہ مناسب نہیں۔
واضح رہے کہ 2026ء کا ورلڈ کپ امریکا، کینیڈا اور میکسیکو میں منعقد ہوگا، جبکہ ایران کے گروپ میچز امریکا میں شیڈول ہیں۔ ایران کو گروپ مرحلے میں بیلجیئم، نیوزی لینڈ اور مصر کے ساتھ رکھا گیا ہے۔
امریکی سفری پابندیوں اور جاری سیاسی تناؤ کے باعث ایران کی ممکنہ شرکت یا بائیکاٹ سے متعلق قیاس آرائیاں تاحال جاری ہیں۔