سعودی عرب کی کابینہ نے پاکستان کے ساتھ سائنسی، تربیتی اور تحقیقی شعبوں میں تعاون اور صحت کے شعبے میں مفاہمتی یادداشتوں پر مذاکرات اور دستخط کی منظوری دے دی۔ یہ اجلاس منگل کے روز ولی عہد محمد بن سلمان کی زیرِ صدارت جدہ میں منعقد ہوا۔
اجلاس میں وزیرِ داخلہ کو پاکستان کے ساتھ سائنسی، تربیتی اور تحقیقی شعبوں میں مفاہمتی یادداشت پر مذاکرات اور دستخط کرنے کا اختیار دیا گیا، جبکہ وزیرِ صحت کو پاکستان اور ہالینڈ کے ساتھ صحت کے شعبے میں تعاون سے متعلق مفاہمتی یادداشتوں پر دستخط کی اجازت دی گئی۔
ولی عہد نے کابینہ کو مصری صدر عبدالفتاح السیسی سے ہونے والی ملاقات کے نتائج سے آگاہ کیا اور دونوں ممالک کے مضبوط دوطرفہ تعلقات کا جائزہ پیش کیا۔ اجلاس میں مشرقِ وسطیٰ کی مجموعی صورتحال، خطے کے امن و استحکام، عرب اور اسلامی ممالک سے متعلق امور اور قازقستان کے صدر کی جانب سے موصول ہونے والے خط پر بھی تبادلۂ خیال کیا گیا۔
وزیرِ اطلاعات سلطان الدوسری نے بتایا کہ کابینہ نے مختلف ممالک کے ساتھ مشترکہ کمیٹیوں اور باہمی تعاون کی پیش رفت کا جائزہ لیا اور دوطرفہ تعلقات کو مزید وسعت دینے پر زور دیا۔ اجلاس میں شوریٰ کونسل کی سفارشات پر بھی غور کیا گیا اور جمہوریہ کرغستان، پاکستان، آرمینیا سمیت دیگر ممالک کے ساتھ مفاہمتی یادداشتوں پر دستخط کی منظوری دی گئی۔