اداکارہ سحر خان نے ایسے پوڈکاسٹرز پر ناراضی کا اظہار کیا ہے جو تفریح کے نام پر مہمانوں، خاص طور پر خواتین، کی تذلیل کرتے ہیں۔ انسٹاگرام اسٹوری میں انہوں نے کہا کہ کئی پوڈکاسٹس کا مقصد صرف مہمانوں کو شرمندہ کرنا ہوتا ہے، اور میزبان جان بوجھ کر ایسے سوالات کرتے ہیں جو ان کی تضحیک کا باعث بنیں۔
انہوں نے بتایا کہ حال ہی میں ایک پروگرام میں خاتون مہمان کی ویڈیوز دکھا کر اُس سے غلط اور صحیح کا فیصلہ کروانے کی کوشش کی گئی، جو اُن کے مطابق غیر مناسب رویہ ہے۔ سحر خان نے کہا کہ کوئی بھی شخص دوسرے کی زندگی کا فیصلہ کرنے کا حق نہیں رکھتا، یہ معاملہ صرف انسان اور خدا کے درمیان ہے۔
اداکارہ نے مشورہ دیا کہ ایسی جگہوں پر جانے سے بچنا چاہیے جہاں عزتِ نفس مجروح ہونے کا خدشہ ہو۔ ساتھ ہی انہوں نے پوڈکاسٹرز کو مخاطب کرتے ہوئے کہا کہ دوسروں کو تکلیف دینے کا سلسلہ بند کریں اور اپنی زندگی سکون سے گزاریں۔