سابق بھارتی کرکٹر اور کپتان سارو گنگولی نے بانیٔ پاکستان تحریک انصاف کے لیے اپنی نیک خواہشات کا اظہار کرتے ہوئے کہا ہے کہ انہیں مناسب طبی سہولیات اور علاج فراہم کیا جانا چاہیے۔
گنگولی نے میڈیا سے گفتگو میں کہا کہ بانیٔ پی ٹی آئی نے پاکستان کرکٹ ٹیم کے کپتان اور پھر وزیرِ اعظم کے طور پر ملک کا نام روشن کیا، اس لیے انسانی بنیادوں پر انہیں علاج فراہم کرنا ضروری ہے۔
اس سے قبل دنیائے کرکٹ کے سابق کپتانوں جیسے سرکلائیو لائیڈ، گریگ چیپل، این چیپل، ایلن بارڈر، مائیکل ایتھرٹن اور دیگر نے بھی حکومتِ پاکستان سے انسانی بنیادوں پر بانیٔ پی ٹی آئی کے لیے مناسب طبی سہولتوں کی اپیل کی تھی۔
پاکستان کے سابق کرکٹرز وسیم اکرم، شعیب اختر، رمیز راجہ، وقار یونس اور شاہد آفریدی نے بھی اس ضمن میں اپیل کی ہے کہ بانیٔ پی ٹی آئی کو عزت اور مناسب علاج فراہم کیا جائے۔