جدہ اور طائف کو 2027ء کے لیے عالمی گیسٹرونومی ایوارڈ
جدہ اور طائف کو 2027ء کے لیے ’طعام و مشروبات کے ماہرانہ فن کے عالمی ریجن‘ کا اعزاز دیا گیا ہے۔ یہ اعزاز گیسٹرونومی، ثقافت، فنون اور سیاحت کے عالمی معیار پر پورا اترنے والے علاقوں کو دیا جاتا ہے۔
اعزاز کے لیے بین الاقوامی ماہرین نے مقامی شعبوں کا تفصیلی جائزہ لیا، جس میں خوراک کی روایت، حیاتیاتی تنوع، نوجوانوں اور کاروباری افراد کو بااختیار بنانے اور ماحولیات کی پائیداری کے اقدامات کو پرکھا گیا۔
سعودی عرب کے طباخی آرٹس کمیشن کی سی ای او میادہ بدر کے مطابق یہ اعزاز عسیر ریجن کو 2024ء میں ملنے والے اعزاز کا تسلسل ہے اور جدہ و طائف کو عالمی سطح پر پہچان دلانے میں مددگار ثابت ہوگا۔
اعزاز کے بعد جدہ اور طائف عالمی گیسٹرونومی نیٹ ورک میں شامل ہو گئے ہیں، جس سے خوراک کی تحقیق، ثقافتی تبادلہ اور ذمہ دارانہ سیاحت کے نئے مواقع پیدا ہوں گے۔ اس اقدام سے تخلیقی معیشت میں کھانے پکانے کے فن کو فروغ، آمدنی کے مواقع میں اضافہ اور عالمی سطح پر تعاون کے راستے کھلیں گے۔
میادہ بدر نے کہا کہ جدہ اور طائف کو ملنے والا یہ اعزاز سعودی عرب کی پکوانوں کی شاندار روایت اور پائیدار ترقی میں کامیابی کی بین الاقوامی تسلیم شدہ نشانی ہے۔