ورلڈ ٹیسٹ چیمپئن شپ میں دو درجاتی سسٹم کا خیال عالمی سطح پر مخالفت کا سامنا کر رہا ہے۔ پاکستان، بنگلا دیش، نیوزی لینڈ کے بعد اب انگلینڈ نے بھی اس کی مخالفت کر دی ہے۔ انگلش کرکٹ بورڈ کے چیئرمین رچرڈ تھامپسن نے کہا ہے کہ اس سسٹم سے ٹاپ ٹیموں کے درمیان میچز متاثر ہوں گے اور بہتر یہی ہے کہ موجودہ فارمیٹ کو بہتر بنایا جائے۔ دوسری جانب کرکٹ آسٹریلیا کے سربراہ ٹوڈ گرین برگ نے مشروط حمایت کا اظہار کیا ہے، ان کا کہنا ہے کہ اگر یہ سسٹم کمزور ٹیموں کو فائدہ دے تو قابلِ غور ہے، بصورت دیگر اس کی حمایت ممکن نہیں۔ واضح رہے کہ آئی سی سی نے نظام میں بہتری کے لیے ورکنگ گروپ بھی قائم کر رکھا ہے۔
