پاکستان ہاکی ٹیم کے کپتان عماد شکیل بٹ نے کہا ہے کہ بھارت نے ایشیا کپ میں جو رویہ اپنایا وہ کھیلوں کے دائرے میں نہیں آتا، کھیل کو سیاست سے دور رکھنا چاہیے۔
لاہور میں گفتگو کرتے ہوئے انہوں نے حارث رؤف کی میدان میں پرفارمنس کو سراہتے ہوئے کہا کہ پاکستان کرکٹ ٹیم نے ایشیا کپ میں شاندار کھیل پیش کیا اور 41 برس بعد ہونے والا فائنل دیکھ کر خوشی ملی۔
عماد بٹ نے بتایا کہ ورلڈ کپ کوالیفائنگ سیریز نومبر میں ڈھاکہ میں ہوگی، ٹیم کے حوصلے بلند ہیں اور سیریز جیت کر ورلڈ کپ کے لیے کوالیفائی کرنے کا عزم رکھتے ہیں۔
انہوں نے مزید کہا کہ پرو ہاکی لیگ پاکستان ہاکی کی بحالی کے لیے نہایت اہم ہے، نو سال کے انتظار کے بعد دنیا کی بہترین ٹیموں کے ساتھ کھیلنے کا موقع ملے گا، ابتدا میں مشکل ضرور ہوگی مگر ٹیم پوری جان لڑائے گی۔
عماد بٹ کے مطابق فیڈریشن کے ساتھ ڈیلیز کے معاملات پر بات چیت جاری ہے اور امید ہے کہ یہ جلد حل ہو جائیں گے۔