ایک نئی تحقیق کے مطابق سونے سے کم از کم تین گھنٹے پہلے کھانا بند کرنے سے بلڈ پریشر اور خون میں شوگر کی سطح بہتر ہو سکتی ہے، جس سے دل اور میٹابولزم پر مثبت اثرات مرتب ہوتے ہیں۔ یہ تحقیق نارتھ ویسٹرن یونیورسٹی، امریکا کے ماہرین نے کی اور طبی جریدے Arteriosclerosis, Thrombosis and Vascular Biology میں شائع ہوئی۔
ماہرین کے مطابق انسانی جسم ایک قدرتی حیاتیاتی گھڑی (سرکیڈین ردھم) کے تحت کام کرتا ہے جو نیند، ہارمونز، دل کی کارکردگی اور میٹابولزم کو کنٹرول کرتی ہے۔ رات گئے کھانے سے یہ نظام متاثر ہوتا ہے، کیونکہ جسم آرام کے بجائے ہاضمے میں مصروف رہتا ہے، جس سے بلڈ پریشر اور شوگر لیول بڑھ سکتے ہیں۔
مطالعے میں 36 سے 75 سال کے 39 موٹے افراد شامل کیے گئے جن میں دل اور شوگر کی بیماری کا خطرہ تھا۔ شرکاء کو دو گروپوں میں تقسیم کیا گیا اور تقریباً ساڑھے سات ہفتے تک مشاہدہ کیا گیا۔ تحقیق کے دوران رضاکاروں نے سونے سے 3 گھنٹے پہلے کھانا بند کیا، روشنی مدھم رکھی اور رات کا فاسٹنگ 13 سے 16 گھنٹے تک رکھا۔
اہم نتائج:
-
رات کے وقت بلڈ پریشر میں تقریباً 3.5 فیصد کمی اور دل کی دھڑکن میں 5 فیصد کمی۔
-
انسولین کی کارکردگی میں بہتری اور گلوکوز برداشت کرنے کی صلاحیت میں اضافہ۔
-
رات میں اسٹریس ہارمون کورٹیسول کی سطح میں کمی، جس سے دل پر دباؤ کم ہوتا ہے اور ہائی بلڈ پریشر و ذیابیطس کے خطرات گھٹ سکتے ہیں۔
ماہرین کی تجاویز:
-
سونے سے 3 گھنٹے قبل رات کا کھانا مکمل کریں۔
-
ہلکی اور متوازن غذا استعمال کریں۔
-
رات میں تیز روشنی اور اسکرین کے استعمال کو محدود کریں۔
-
بھوک لگنے پر کھانے کے بجائے ہربل چائے یا نیم گرم پانی استعمال کریں۔
یہ تحقیق بتاتی ہے کہ کھانے کے اوقات کو جسم کی حیاتیاتی گھڑی کے مطابق رکھنا صحت پر اتنا ہی اثر رکھتا ہے جتنا کھانے کی مقدار یا نوعیت