کراچی کے علاقے لیاری میں رینجرز اور ایس آئی یو پولیس نے بھتہ خوروں کے خلاف مشترکہ آپریشن کرتے ہوئے 2 ملزمان کو گرفتار کر لیا۔
ترجمان رینجرز کے مطابق گرفتار ملزمان میں عدنان عرف ملا اور فیصل شامل ہیں۔ عدنان عرف ملا کا تعلق مبینہ طور پر سدیس پپو گروپ سے بتایا گیا ہے اور وہ دکانداروں و دیگر کاروباری افراد سے بھتہ وصول کرنے میں ملوث رہا ہے۔
رینجرز کے ترجمان کا کہنا ہے کہ گرفتار دوسرا ملزم فیصل، مبینہ طور پر بھتہ مافیا کے سرغنہ جمیل چھانگا کا قریبی ساتھی ہے اور شہر میں بھتہ کی رقم کی ترسیل میں کردار ادا کرتا رہا ہے۔
حکام کے مطابق ملزمان کے خلاف قانونی کارروائی جاری ہے جبکہ مزید تفتیش بھی کی جا رہی ہے۔