بھارت کی ریاست جھارکھنڈ میں ایک ایئر ایمبولینس حادثے کا شکار ہو گئی جس کے نتیجے میں مریض سمیت سات افراد جان کی بازی ہار گئے۔
رپورٹس کے مطابق طیارہ پیر کی رات رانچی سے نئی دہلی جا رہا تھا کہ چترا ضلع کے علاقے میں گر کر تباہ ہو گیا۔ حادثے میں عملے کے دو ارکان اور ایک مریض سمیت تمام سوار افراد ہلاک ہوئے۔
حادثے کا شکار ہونے والا طیارہ بیچ کرافٹ سی 90 ماڈل تھا، جسے مریض کو علاج کی غرض سے دارالحکومت منتقل کرنے کے لیے استعمال کیا جا رہا تھا۔
واقعے کی وجوہات جاننے کے لیے متعلقہ تحقیقاتی ادارے کی ٹیم روانہ کر دی گئی ہے جبکہ مقامی انتظامیہ اور پولیس نے جائے وقوعہ کو گھیرے میں لے کر شواہد اکٹھے کرنا شروع کر دیے ہیں۔
یہ افسوسناک سانحہ حالیہ عرصے میں پیش آنے والے فضائی حادثات کے سلسلے کی ایک اور کڑی قرار دیا جا رہا ہے۔