دریائے راوی میں شاہدرہ کے مقام پر پانی کی سطح بڑھ رہی ہے جہاں بہاؤ ایک لاکھ 74 ہزار کیوسک سے تجاوز کرگیا ہے۔ جسٹر اور بلوکی کے مقامات پر بھی اونچے درجے کا سیلاب ریکارڈ کیا گیا ہے۔
دریائے چناب میں قادر آباد اور خانکی کے قریب انتہائی اونچے درجے کا سیلاب موجود ہے، تاہم دونوں جگہ پانی کی مقدار میں بتدریج کمی دیکھنے میں آرہی ہے۔
دریائے ستلج پر ہیڈ سلیمانکی میں درمیانے درجے کا سیلاب ہے اور پانی کی آمد ایک لاکھ 9 ہزار کیوسک سے زائد ریکارڈ کی گئی۔ بہاولنگر کے کئی دیہات اور بستیاں زیرِ آب آچکی ہیں، جہاں رابطہ سڑکیں اور عارضی حفاظتی بند ٹوٹ گئے۔
ریسکیو ذرائع کے مطابق اب تک دو ہزار سے زیادہ افراد کو محفوظ مقامات پر منتقل کیا جاچکا ہے جبکہ انتظامیہ نے 18 فلڈ ریلیف کیمپس قائم کر دیے ہیں۔
دریائے چناب میں کوٹ مومن کے علاقے میں بھی چھ لاکھ کیوسک کا ریلا داخل ہوا ہے۔ سرگودھا میں 2500 افراد اور 1700 سے زائد مویشی محفوظ مقامات پر منتقل کر دیے گئے ہیں، اور ریلا گزرنے کے بعد نقصانات کا تخمینہ لگایا جائے گا۔