سعودی ولی عہد و وزیراعظم شہزادہ محمد بن سلمان سے جدہ میں برطانوی وزیراعظم کیئر سٹارمر نے بدھ کو ملاقات کی، جس میں دونوں رہنماؤں نے سعودی عرب اور برطانیہ کے تعلقات، سٹریٹیجک شراکت داری اور مختلف شعبوں میں تعاون بڑھانے کے طریقوں پر بات کی۔
ملاقات میں حالیہ علاقائی اور بین الاقوامی صورتحال، سلامتی، اقتصادی اثرات اور باہمی دلچسپی کے دیگر امور پر بھی تبادلۂ خیال کیا گیا۔ دونوں رہنماؤں نے خطے میں امن و استحکام کو برقرار رکھنے کی کوششوں کی حمایت پر زور دیا۔
اس موقع پر مکہ ریجن کے نائب گورنر، برطانیہ میں سعودی سفیر، وزیر مملکت، قومی سلامتی کے مشیر، وزیر تجارت اور انٹیلی جنس ڈائریکٹوریٹ کے سربراہ بھی موجود تھے۔
برطانوی خبر رساں ایجنسی روئٹرز کے مطابق کیئر سٹارمر نے ایران اور امریکہ کے درمیان جنگ بندی کا خیرمقدم کیا اور کہا کہ معاہدے کو مستقل بنانے اور آبنائے ہرمز کے مسائل حل کرنے کے لیے ابھی بہت کام باقی ہے۔