سعودی عرب کے شمال مغرب میں واقع حقل کمشنری کا النخیل پارک عید الفطر کی تعطیلات کے دوران سیاحوں اور فیملیز کی توجہ کا مرکز رہا۔ تعطیلات کے دوران وزیٹرز کی بڑھتی ہوئی تعداد نے مملکت کے ابھرتے ہوئے ساحلی سیاحتی مقام کے طور پر حقل کمشنری کی اہمیت کو مزید بڑھا دیا ہے۔
پارک، جو تبوک شہر سے تقریباً 220 کلومیٹر شمال مغرب میں واقع ہے، قدرتی حسن اور سرسبز مناظر سے مالا مال ہے۔ یہاں سائیکلنگ ٹریک، واک ویز، پینورامک نظارے اور ساحلی کنارے موجود ہیں، جبکہ سبزہ زاروں کے درمیان بل کھاتے راستے اور پگڈنڈیاں سیاحوں کے لیے خوبصورتی میں اضافہ کرتی ہیں۔
وزیٹرز کے مطابق بلند و بالا کھجور کے درخت، تازہ سمندری ہوا اور پرسکون ماحول اس مقام کی سب سے بڑی کشش ہیں۔ بچوں کی تفریح کے لیے بھی خصوصی انتظامات موجود ہیں اور وسیع رقبے کو کار پارک کے لیے مختص کیا گیا ہے۔
پہاڑوں، ساحلی پٹیوں اور سرسبز پارکوں کے امتزاج نے حقل کمشنری کو ایک نایاب سیاحتی منزل بنا دیا ہے، جہاں صحرا، سمندر اور قدرتی مناظر ایک ساتھ نظر آتے ہیں