مکہ مکرمہ کے حرا کلچرل ڈسٹرکٹ میں قائم قرآن کریم میوزیم میں نادر اور قدیم قرآنی نسخوں کی خصوصی نمائش کی جا رہی ہے، جس میں ایک تاریخی نسخہ خاص توجہ کا مرکز بنا ہوا ہے۔
رپورٹس کے مطابق یہ قدیم نسخہ 1259 ہجری (1843 عیسوی) کا ہے، جسے اسلامی خطاطی کے اعلیٰ فن کا شاہکار قرار دیا جا رہا ہے۔ یہ نسخہ نہایت باریک اور نفیس خط میں تحریر کیا گیا ہے، جس میں سیاہ روشنائی اور سنہری حاشیے کا خوبصورت استعمال کیا گیا ہے۔
نسخے میں آیات، رکوع اور اعراب کو خاص اہتمام کے ساتھ واضح کیا گیا ہے تاکہ تلاوت میں آسانی ہو، جبکہ اس کی دوبارہ جلد بندی بھی کی گئی ہے تاکہ اسے وقت کے اثرات سے محفوظ رکھا جا سکے۔
میوزیم میں موجود دیگر تاریخی قرآنی مخطوطات بھی اسلامی تہذیب اور قرآن کریم کی حفاظت و خدمت کی صدیوں پر محیط روایت کی عکاسی کرتے ہیں۔