وزیرِ خزانہ کے مشیر خرم شہزاد نے واضح کیا ہے کہ موٹر سائیکل سبسڈی سب کے لیے نہیں ہوگی بلکہ صرف مستحق افراد کو دی جائے گی۔ ان کے مطابق مہنگی یا ہیوی بائیک رکھنے والے افراد اس رعایت کے دائرے میں نہیں آئیں گے۔
انہوں نے بتایا کہ صوبوں کے پاس موٹر سائیکلوں کا مکمل ڈیٹا موجود ہے اور اسی بنیاد پر سبسڈی سے متعلق تجاویز دی گئی ہیں۔ مزید یہ کہ ایک ایپ کے ذریعے یہ جانچ ممکن ہوگی کہ کون سبسڈی کا اہل ہے، جبکہ بی آئی ایس پی کا ریکارڈ بھی مستحق افراد کی نشاندہی میں مدد دے گا۔
خرم شہزاد نے عالمی صورتحال کا حوالہ دیتے ہوئے کہا کہ کئی ممالک میں تیل کی قیمتوں میں نمایاں اضافہ ہوا ہے، جبکہ مقامی سطح پر کچھ عرصے سے قیمتیں برقرار رکھی گئی ہیں۔ انہوں نے امید ظاہر کی کہ عالمی حالات بہتر ہونے پر عوام کو ریلیف دیا جائے گا۔