انٹرنیشنل کرکٹ کونسل (آئی سی سی) نے کہا ہے کہ ٹی ٹوئنٹی ورلڈ کپ میں شریک بعض ٹیموں کے کھلاڑیوں اور سپورٹ اسٹاف کی وطن واپسی میں تاخیر مشرقِ وسطیٰ میں جاری کشیدگی اور فضائی سفر میں رکاوٹوں کے باعث ہوئی ہے۔
آئی سی سی کے مطابق فضائی حدود کی بندش، میزائل وارننگز، پروازوں کے راستوں میں تبدیلی اور فلائٹس کی اچانک منسوخی یا ری شیڈولنگ کی وجہ سے سفری انتظامات پیچیدہ ہو گئے ہیں۔ کونسل کا کہنا ہے کہ متاثرہ ٹیموں کی محفوظ واپسی کے لیے ایئر لائنز، ایئرپورٹ حکام اور مختلف ممالک کے اداروں سے مسلسل رابطہ کیا جا رہا ہے۔
بیان کے مطابق جنوبی افریقا کی ٹیم آج رات وطن واپسی کا سفر شروع کرے گی جبکہ ویسٹ انڈیز کے کچھ ارکان پہلے ہی روانہ ہو چکے ہیں اور باقی کھلاڑی آئندہ 24 گھنٹوں میں بھارت سے روانہ ہوں گے۔
آئی سی سی نے واضح کیا کہ ٹیموں کے سفری انتظامات میں کسی قسم کی ترجیح یا امتیاز نہیں برتا جا رہا اور کھلاڑیوں کی مکمل حفاظت یقینی بنائے بغیر کسی کو روانہ نہیں کیا جائے گا۔