شہباز شریف نے ہندو برادری کو ہولی کی مبارک باد دیتے ہوئے کہا ہے کہ یہ تہوار رنگوں کے حسین امتزاج کے ذریعے معاشرتی ہم آہنگی اور بھائی چارے کا پیغام دیتا ہے۔
وزیراعظم نے اپنے پیغام میں کہا کہ ہولی کی روایات پاکستان کے ثقافتی تنوع کی عکاسی کرتی ہیں اور ہندو کمیونٹی ملک کے معاشرے کا قابلِ قدر حصہ ہے۔ ان کے بقول اقلیتی برادری نے سماجی ہم آہنگی، معاشی ترقی اور پُرامن بقائے باہمی میں مثبت کردار ادا کیا ہے۔
انہوں نے اس عزم کا اعادہ کیا کہ آئینِ پاکستان تمام شہریوں کو بلا تفریق مذہبی آزادی اور انسانی حقوق فراہم کرتا ہے اور حکومت اقلیتوں کے آئینی حقوق کے تحفظ کے لیے پُرعزم ہے۔
وزیراعظم نے بین المذاہب ہم آہنگی، عبادت گاہوں کے تحفظ اور باہمی احترام کے فروغ پر زور دیتے ہوئے کہا کہ رواداری اور یکجہتی کے ذریعے ہی ایک پُرامن اور خوشحال مستقبل کی بنیاد رکھی جا سکتی ہے۔