آپریشن سوئفٹ ریٹارٹ کو سات سال مکمل ہونے پر افواجِ پاکستان نے اس تاریخی کارروائی کو خراجِ تحسین پیش کیا ہے۔
پاک فوج کے شعبہ تعلقاتِ عامہ (آئی ایس پی آر) کے مطابق فیلڈ مارشل سید عاصم منیر اور سربراہانِ بحریہ و فضائیہ نے مشترکہ پیغام میں اس عزم کا اعادہ کیا کہ قومی سلامتی اور علاقائی امن کے تحفظ کے لیے پاکستان کا عزم غیر متزلزل ہے۔
بیان میں کہا گیا کہ 27 فروری 2019ء کو شروع کیے گئے اس آپریشن کے ذریعے بھارتی جارحیت کا فیصلہ کن جواب دیا گیا، جس سے افواجِ پاکستان کی پیشہ ورانہ مہارت، تیاری اور دفاعی صلاحیتیں نمایاں ہوئیں۔
آئی ایس پی آر کے مطابق اس کارروائی نے مزید جارحیت کو روکا اور خطے میں تزویراتی توازن بحال کیا۔ قیادت نے اس موقع پر اس عزم کا اظہار بھی کیا کہ افواجِ پاکستان ہر خطرے کا بھرپور مقابلہ کرنے کے لیے مکمل طور پر تیار ہیں۔
بیان میں مزید کہا گیا کہ پاکستان اپنی خود مختاری کے تحفظ اور عالمی استحکام میں مثبت کردار ادا کرتا رہے گا۔