انگلش کرکٹ بورڈ (ای سی بی) نے دی ہنڈریڈ ٹورنامنٹ میں پاکستانی کھلاڑیوں کو نظر انداز کرنے کی خبروں کی سختی سے تردید کی ہے۔ بورڈ اور ٹورنامنٹ کی تمام 8 فرنچائزز نے مشترکہ بیان میں کہا کہ ٹورنامنٹ ہر لحاظ سے جامع، خوش آئند اور سب کے لیے قابلِ رسائی ہوگا اور کسی بھی کھلاڑی کو قومیت کی بنیاد پر خارج نہیں کیا جائے گا۔
بیان میں مزید کہا گیا کہ دی ہنڈریڈ کا مقصد نئے شائقین تک رسائی، کرکٹ کے دائرہ کار کو وسیع کرنا اور ہر نسل، مذہب، جنس اور پس منظر کے افراد کو کھیل میں شامل کرنا ہے۔ کھلاڑیوں کا انتخاب صرف کارکردگی، دستیابی اور اسکواڈ کی ضرورت کے مطابق ہوگا، نہ کہ قومیت کی بنیاد پر۔
ای سی بی نے واضح کیا کہ وہ چاہتے ہیں کہ ٹورنامنٹ میں دنیا بھر کے بہترین کھلاڑی شریک ہوں اور یہ شمولیت اور برابری کی مثال بنے۔ یہ وضاحت برطانوی میڈیا کی رپورٹس کے بعد سامنے آئی، جن میں دعویٰ کیا گیا تھا کہ کچھ فرنچائزز، جن میں آئی پی ایل سرمایہ کاری شامل ہے، پاکستانی کھلاڑیوں کو اگلے ڈرافٹ میں شامل نہیں کر سکتیں۔