سعودی عرب میں تاریخی مساجد کی بحالی اور تعمیرِ نو کے منصوبے کے تحت شہزادہ محمد بن سلمان کی ہدایت پر مکہ ریجن کی الجموم کمشنری میں واقع مسجد الفتح کی بحالی کا کام جاری ہے۔
منصوبے کے پہلے اور دوسرے مرحلے میں تقریباً 50 فیصد تاریخی مساجد کو ان کی اصل شناخت کے ساتھ بحال کیا جا چکا ہے، اور ملک بھر میں 130 تاریخی مساجد میں سے 60 کی بحالی مکمل ہو چکی ہے۔ مسجد الفتح کا رقبہ 455.77 مربع میٹر سے بڑھا کر 553.5 مربع میٹر کیا جائے گا اور مصلوں کی گنجائش 218 سے بڑھا کر 333 ہو جائے گی۔
تاریخی حوالے کے مطابق، نبی اکرم ﷺ نے فتح مکہ کے بعد مسجد الفتح میں نماز ادا کی تھی، اسی مناسبت سے اس کا نام رکھا گیا۔ تعمیرِ نو میں حجاز کے روایتی طرزِ تعمیر کو اپنایا گیا ہے، اور جپسم، لکڑی اور بیسالٹ پتھر کا استعمال کیا گیا ہے۔
مسجد الفتح دوسرے مرحلے کے تحت بحالی کے منصوبے میں شامل ہے، جس میں مملکت کے دیگر 30 تاریخی مساجد کی بھی بحالی کی جائے گی۔ یہ منصوبہ سعودی عرب کے ثقافتی ورثے کے تحفظ اور مساجد کی تاریخی و مذہبی اہمیت کو بڑھانے کے لیے وژن 2030 کے اہداف کا حصہ ہے۔