واشنگٹن میں پاکستان اور امریکا کے درمیان ٹیرف معاہدے سے متعلق مذاکرات کامیاب رہے جن پر وزیر خزانہ محمد اورنگزیب نے اطمینان کا اظہار کیا ہے۔
وزیر خزانہ نے آئی ایم ایف اور ورلڈ بینک کے سالانہ اجلاسوں کے موقع پر امریکی محکمہ خزانہ کے حکام سے ملاقات کی اور پاکستان کی بہتر معاشی کارکردگی پر بریفنگ دی۔
انہوں نے امریکی کمپنیوں کو تیل و گیس، معدنیات، زراعت اور آئی ٹی کے شعبوں میں سرمایہ کاری کی دعوت دی۔
یو ایس پاکستان بزنس کونسل سے ملاقات میں معیشت کے استحکام اور نجی شعبے کے کردار پر زور دیا گیا، جبکہ ریکوڈک منصوبے کے مالی معاملات جلد طے کرنے پر بھی اتفاق ہوا۔
وزیر خزانہ نے آئی ایف سی کے علاقائی دفتر کے اسلام آباد میں قیام کا خیرمقدم کرتے ہوئے مستقبل میں تعاون بڑھانے کے عزم کا اظہار کیا۔