لاہور قلندرز کے کپتان شاہین شاہ آفریدی نے کہا ہے کہ انہیں گیند کی حالت میں تبدیلی کے بارے میں علم نہیں تھا، جس کی وجہ سے پاکستان سپر لیگ کے میچ میں ٹیم پر 5 رنز کی پنالٹی عائد ہوئی۔
یہ پنالٹی پی ایس ایل 11 کے کراچی کنگز کے خلاف قذافی اسٹیڈیم میں کھیلے گئے میچ کے دوران دی گئی، جب آن فیلڈ امپائرز نے گیند کا معائنہ کر کے اسے تبدیل شدہ قرار دیا۔ اس فیصلے کے بعد ہدف کا حساب بدل گیا اور کراچی کنگز کو آخری اوور میں 14 کے بجائے 9 رنز درکار تھے۔
میچ کے اختتام پر عباس آفریدی کی شاندار بیٹنگ کی بدولت کراچی کنگز نے لاہور قلندرز کو 4 وکٹوں سے شکست دی۔
شاہین شاہ آفریدی نے امپائرز کے فیصلے پر مایوسی کا اظہار کرتے ہوئے کہا کہ وہ اس معاملے پر بات کریں گے اور گیند کی تبدیلی سے لاعلمی ظاہر کی۔ انہوں نے ٹیم کی مجموعی کارکردگی کو بہتر قرار دیتے ہوئے کہا کہ بیٹنگ مناسب رہی اور میچ کافی سنسنی خیز رہا۔
اس فتح کے بعد کراچی کنگز نے لاہور قلندرز کے خلاف اپنے مجموعی ریکارڈ میں 15-8 کی برتری حاصل کر لی ہے۔