امریکی رکنِ کانگریس ٹام سوازی نے کہا ہے کہ دہشتگردی کے خلاف عالمی جنگ میں پاکستان اہم کردار ادا کر رہا ہے اور اس بوجھ کا بڑا حصہ اکیلے اٹھا رہا ہے۔ انہوں نے یہ بات امریکا میں پاکستانی سفیر رضوان سعید کے ہمراہ پریس کانفرنس کے دوران کہی۔
ٹام سوازی کے مطابق دہشتگردی خطے کا بڑا مسئلہ ہے جبکہ حالیہ امریکا-ایران کشیدگی میں بھی پاکستان کا کردار اہم رہا ہے۔ انہوں نے پاک-امریکا تعلقات میں بہتری اور پاکستان میں امریکی سرمایہ کاری بڑھانے کی خواہش کا بھی اظہار کیا۔
اس موقع پر پاکستانی سفیر رضوان سعید نے کہا کہ پاکستان آج بھی دہشتگردی کے خلاف جنگ میں مصروف ہے اور اس کی بھاری قیمت ادا کر رہا ہے۔ انہوں نے مزید کہا کہ پاکستان خطے میں پائیدار امن کا خواہاں ہے اور اس مقصد کے لیے سفارتی کوششیں جاری رکھے ہوئے ہے۔