وفاقی وزیر چوہدری سالک حسین نے اسلام آباد میں پاکستان گورننس فورم 2026 کے موقع پر گفتگو کرتے ہوئے کہا کہ حکومت سمندر پار پاکستانیوں کے حقوق کے تحفظ، شفاف گورننس اور اداروں کی ڈیجیٹائزیشن کے لیے اہم اصلاحات متعارف کروا رہی ہے۔ انہوں نے پالیسیوں کے تسلسل کی ضرورت پر زور دیتے ہوئے کہا کہ سرمایہ کاروں کو طویل مدتی استحکام فراہم کرنا حکومت کی ترجیح ہے۔ وزیرِ موصوف کے مطابق اسپین میں مقیم ہزاروں پاکستانیوں کو قانونی حیثیت دینے کے اقدامات جاری ہیں جبکہ بیرون ملک روزگار کے مواقع بڑھانے، سافٹ اسکلز تربیت، اور امیگریشن نظام کو مکمل ڈیجیٹل بنانے پر بھی کام ہو رہا ہے۔ انہوں نے بتایا کہ اوورسیز پاکستانیوں کے جائیداد سے متعلق مسائل کے حل کے لیے خصوصی عدالتیں قائم کی جا رہی ہیں تاکہ مقررہ مدت میں فیصلے ممکن بنائے جا سکیں۔
