لاہور میں سینئر صحافیوں سے گفتگو کرتے ہوئے جے یو آئی کے سربراہ مولانا فضل الرحمان نے کہا کہ خلیجی ممالک کے لیے امریکی ائیر بیسز فائدے کے بجائے نقصان کا سبب بن رہے ہیں۔ انہوں نے عالمی صورتحال پر تشویش ظاہر کرتے ہوئے کہا کہ موجودہ حالات بڑی جنگ کا پیش خیمہ بن سکتے ہیں۔
ان کا کہنا تھا کہ پاکستان کو عالمی سطح پر تنازعات کے حل کے لیے کردار ادا کرنا چاہیے اور مذاکرات ہی مسائل کا واحد راستہ ہیں۔ انہوں نے سابق وزیراعظم عمران خان کو سیاسی سرگرمیوں کا موقع دینے کی بھی بات کی، تاہم کہا کہ تحریک انصاف سے رابطے نتیجہ خیز ثابت نہیں ہوئے۔
مولانا فضل الرحمان نے سی پیک اور چین کے ساتھ تعلقات میں جمود پر سوال اٹھاتے ہوئے پالیسیوں میں تسلسل پر تشویش ظاہر کی۔ انہوں نے انتخابات کے عمل اور اداروں کے کردار پر بھی تنقید کی اور کہا کہ حالات سے سبق سیکھنے کی ضرورت ہے۔
انہوں نے مزید کہا کہ مدارس کے حوالے سے حکومتی پالیسیوں میں تبدیلی نہیں آئی اور رجسٹریشن سمیت دیگر مسائل بدستور برقرار ہیں۔ اجلاس میں مختلف سینئر صحافی اور جے یو آئی کے رہنما بھی شریک تھے۔