مکہ میں نایاب قرآنی نسخے کی نمائش، زائرین کی دلچسپی میں اضافہ

مکہ مکرمہ کے حِرا کلچرل ڈسٹرکٹ میں قائم قرآن میوزیم میں 19ویں صدی کا ایک نایاب قرآنی نسخہ نمائش کے لیے پیش کیا گیا ہے جو بھارت سے حاصل کیا گیا تھا۔

سعودی پریس ایجنسی کے مطابق یہ خوبصورت نسخہ منفرد ہشت پہلو ڈیزائن اور اعلیٰ فنکارانہ خطاطی کا حامل ہے، جسے آسانی سے اٹھایا جا سکتا ہے اور اس میں قدیم اسلامی فنِ کتابت کی جھلک نمایاں ہے۔

میوزیم کا مقصد قرآن کی تاریخ، خطاطی کے ارتقا اور اسلامی فنون سے زائرین کو روشناس کرانا ہے، جبکہ اس سے حِرا ڈسٹرکٹ کی سیاحتی اہمیت میں بھی اضافہ ہو رہا ہے۔

نمائش میں دیگر نایاب اشیاء بھی رکھی گئی ہیں جن میں خانہ کعبہ کے دروازے کا فنکارانہ ماڈل اور پہلی وحی کی عکاسی کرنے والا ایک تاریخی فن پارہ شامل ہے۔

حِرا کلچرل ڈسٹرکٹ میں موجود یہ میوزیم اسلامی تاریخ اور ثقافتی ورثے کو جدید انداز میں پیش کر رہا ہے، جس سے دنیا بھر سے آنے والے زائرین کی دلچسپی میں مسلسل اضافہ ہو رہا ہے۔