کراچی کے علاقے گلستانِ جوہر میں قانون نافذ کرنے والے اداروں نے ایک مطلوب شدت پسند کو حراست میں لے لیا۔ رینجرز کے مطابق گرفتار ملزم، دوست محمد، کا تعلق باجوڑ سے ہے اور وہ سیکیورٹی اداروں کو مختلف مقدمات میں مطلوب تھا۔
ترجمان کے مطابق ملزم 2020 میں خیبر پختونخوا کے علاقے نواگئی میں اسسٹنٹ کمشنر پر حملے اور سرکاری املاک کو نقصان پہنچانے کے واقعے میں مبینہ طور پر شامل رہا۔ اس مقدمے کا اندراج تھانہ سی ٹی ڈی مالاکنڈ ریجن میں انسدادِ دہشت گردی کی دفعات کے تحت کیا گیا تھا۔
رینجرز حکام کا کہنا ہے کہ ملزم واقعے کے بعد کراچی میں روپوش تھا اور مبینہ طور پر مزید کارروائیوں کی منصوبہ بندی کر رہا تھا۔ دیگر ساتھیوں کی گرفتاری کے لیے بھی چھاپے جاری ہیں۔