رحیم یار خان میں امدادی رقوم کی تقسیم کے دوران دکان کی چھت گرنے سے 8 خواتین کے جاں بحق ہونے کے واقعے کا مقدمہ تھانہ ایئرپورٹ میں درج کر لیا گیا ہے۔ مقدمہ امدادی ادارے کی مدعیت میں درج کیا گیا جس میں ڈیوائس ایجنٹ سمیت 5 افراد کو نامزد کیا گیا ہے۔
ڈی پی او عرفان سمو کے مطابق ملزمان پر الزام ہے کہ انہوں نے غیر محفوظ جگہ یعنی دکان کی چھت پر رقم تقسیم کرنے کا انتظام کیا، جسے مجرمانہ غفلت قرار دیا گیا ہے۔ اسی غفلت کے باعث چھت گرنے سے متعدد خواتین جاں بحق اور کئی زخمی ہوئیں۔
پولیس کا کہنا ہے کہ واقعے میں ملوث افراد کی گرفتاری کے لیے چھاپے مارے جا رہے ہیں اور ذمہ داروں کے خلاف قانونی کارروائی کی جائے گی۔ واضح رہے کہ اس حادثے میں 8 خواتین جان سے گئیں جبکہ 80 سے زائد افراد زخمی ہوئے تھے۔