یومِ شہادتِ حضرت علیؓ کے موقع پر ملک کے مختلف شہروں میں جلوس اور مجالس کا انعقاد کیا جا رہا ہے جبکہ سیکیورٹی کے سخت انتظامات کیے گئے ہیں۔
کراچی میں مرکزی جلوس نشتر پارک سے برآمد ہو کر حسینیہ ایرانیان کھارادر پر اختتام پذیر ہوگا۔ پولیس کے مطابق جلوس کے راستوں پر آنے والی سڑکیں اور گلیاں بند کر دی گئی ہیں جبکہ سی سی ٹی وی نگرانی، اسنائپرز کی تعیناتی اور کوئیک رسپانس ٹیمیں بھی الرٹ ہیں۔ سندھ کے وزیر داخلہ ضیاء لنجار نے سیکیورٹی ہائی الرٹ رکھنے اور مساجد و امام بارگاہوں پر خصوصی نگرانی کی ہدایت دی ہے۔
ملتان میں مرکزی جلوس چاہ بوہڑ والا سے نکل کر مختلف راستوں سے ہوتا ہوا امام بارگاہ لال کرتی پہنچے گا۔ شہر میں 12 جلوس اور 15 مجالس منعقد ہوں گی جبکہ 2 ہزار سے زائد پولیس اہلکار سیکیورٹی پر تعینات ہیں۔
اسی طرح ٹوبہ ٹیک سنگھ میں بھی یومِ علیؓ کے سلسلے میں 8 جلوس اور 13 مجالس کا انعقاد کیا جا رہا ہے، جہاں سیکیورٹی کے لیے پولیس اہلکاروں اور رضاکاروں کی بڑی تعداد تعینات کی گئی ہے۔