کویت میں خلیجی تعاون کونسل اور یورپی یونین کے وزرائے خارجہ کا 29واں مشترکہ اجلاس منعقد ہوا، جس کی صدارت کویتی وزیر خارجہ عبداللہ علی الیحییٰ اور یورپی یونین کی نمائندہ کایا کالاس نے مشترکہ طور پر کی۔
اجلاس میں دونوں فریقین نے 1988 کے تعاون معاہدے کے تحت قائم اسٹریٹجک شراکت داری میں پیش رفت پر اطمینان ظاہر کیا اور عالمی امن، سلامتی، اور معیشت کے چیلنجز سے نمٹنے کے لیے تعاون جاری رکھنے کے عزم کا اعادہ کیا۔
بیان میں انتہا پسندی، نفرت انگیز تقاریر اور نسل پرستی کے خاتمے کے لیے مشترکہ کوششوں پر زور دیا گیا، جبکہ انسانی حقوق اور بین الثقافتی مکالمے کو فروغ دینے پر بھی اتفاق کیا گیا۔
مزید برآں، دونوں خطوں کے درمیان ویزا فری سفر کے امکانات پر بات چیت کرنے اور آئندہ سربراہی اجلاس 2026 میں سعودی عرب میں منعقد کرنے کا فیصلہ کیا گیا۔